انواع مضادات السموم اللى بتتباع فى الدكاكين

ايه هى انواع مضادات السموم اللى بتتباع فى

 الدكاكين ؟

مصطفي قنديل كاتب المقال 

  1- مضادات سموم (حمضية) : واى مربى ممكن يعرفها من ريحتها  الخل او بتلاقى مكتوب عليها بالعربى  (حمض) او  بالانجليزى (acid)  ....

 2- مضادات سموم بيولوجية : بتلاقى ريحتها خميرة او شكلها مية خميرة وبيكون مكتوب عليها بيتاجلوكان ..منان ..و البكتيريا النافعة بتساعد برضو ..

 ______________________________________________

 طيب ايه الفرق بين النوعين (الحمضى والبيولوجى ) ؟؟

 اولا :الحمضى (ابو ريحة الخل ) .. ده عامل زى المدشة بيكسر السموم ويدشدشها  لحتت صغيرة علشان يغير من خصائصها وتمتص جوه الدم و بعدين تخرج تانى عالسريع من خلال الكلية و متفضلش متخزنة جوه جسم الفراخ ..

 ثانيا مضادات السموم الطبيعية او البيولوجية (ام ريحة الخميرة ) دى عاملة زى الاسفنجه بالظبط  ..بتمتص(تمتز )  السموم وتخرجها من غير ما السموم تدخل للدم و للانسجة ..

 ______________________________________________

 طيب مين فيهم الافضل (الحمضى والا البيولوجى ؟؟)

 اولا مضاد السموم الحمضى (ابو ريحة الخل) .. والسيليكا . بيشتغلوا على السموم الموجود عليها شحنات ؛ يعنى المضاد بيجذب السموم زى المغناطيس كده .. ولكن للاسف مش كل السموم بيكون عليها شحنات علشان تنجذب للمضادات   دى .. لكن الحمد لله  ان اخطر نوعين (الافلا توكسين  .و. الاوكرا توكسين ) عليهم شحنات وينفع معهم المضاد الحمضى .. لكن للاسف مهما تحط مضادات سموم حمضية هتفضل اعراض السموم موجودة وهتشوف افرازات كلوية كتير واعراض سموم برضو ..لكن المضاد هيقلل الاثر شوية صغار  ..

 لكن مضاد السموم البيولوجى بياخد السموم و يطردها برة  علطول ولا امتصاص جوه الجسم  ولا شحنات ولا بتاع .. لكن عيبه انه مينفعش ينضاف للعلف أثناء عملية تصنيعه لان  حرارة التصنيع العالية هتبوظه وتكسره و تقلل من  مفعوله ويبقا هو السم  ..

 ______________________________________________

 طيب نعالج ازاى السموم ؟

 1-  اول خطوة هى (( تغيير العلف ))  لو ثبت ان فيه سموم ..لان صدقونى اى حد هيقولك نزل مضاد سموم بيضحك  على نفسه قبل ما يضحك عليك .. و دى اهم خطوة لان الخطوات اللى بعد كده مترتبه عليها .

 2 -  بعد ما نغير العلف المسموم نضيف  مضاد سموم بيولوجى لمياه الشرب علشان تاخد بقية السموم اللى فايته  من السيليكا  لان معروف ان شركات الاعلاف تضيف  السيليكا للعلف  .

 3 - اضافة منشط كبد علشان  يحمى ويعالج الكبد  اللى اتهرى .

 4 - اضافة غسيل كلوى برضو علشان يسرع عملية التخلص من السموم و ينضف الكلية ..

 5 - بعد كده اول ما تحس ان الدنيا ظبطت معاك و بقت تمام ابدأ انزل بشوية فيتامينات خصوصا فيتامين (دال ) علشان الدال على الخير كفاعلة 😗...

 _____________________________________________

 طيب نيجى للنقطة المهمة بقا :  ليه الأعلاف فى مصر معدتش حلوة  زى زمان وبقت وحشة كده ؟

 لان التصنيع بيحتاج حرارة عالية شوية ( مش زى زمان كان دش وخلاص)  . وطبعا الحرارة العالية دى فى وجود الكربوهيدرات مع وجود الليسين الصناعى (خصوصا) بيعمل مركبات غير  مرغوب فيها لها اثر سمى قليل  ( تفاعل ميلارد )) ..

 و بالتالى هنلاقى ان الاعلاف الدش افضل صحيا  شوية ؛ و كمان لان الاعلاف الدش   كانت بتهدى عملية التحويل شوية و تقلل من ضغط اللحم اوالعضلات على الاعضاء الداخلية زى القلب لانها  لسه صغيرة مقارنة بعمرها و  حجمها   .

 كمان الخامات اللى بتدخل مصر درجتها مش كويسة زى اللى بتروح للناس التانيين  ..وكمان لان انواع السموم كتير وهما تقريبا هنا مبيحللوش الا نوعين اتنين بس هما (افلا  . و . اوكرا ) وخلاص ..